Summa Theologiae Moralis, vol. I: De Principiis
Benedictus Henricus Merkelbach (1871–1942)
Summa Theologiae Moralis ad mentem D. Thomae et ad normam iuris novi
First published 1935
Volume I (De principiis) of Benedictus Henricus Merkelbach's Summa theologiae moralis sets out the foundations of Catholic moral theology within a Thomistic framework. It treats human acts, conscience, law, sin, and merit in relation to the canon law of its period. The present edition follows the Paris text published by Desclée de Brouwer in 1935 and includes the Latin text with an English translation. It comprises the first volume of the three-volume Summa.
Prologus
Non desunt bona manualia theologiae moralis. Pauca tamen saeculo elapso prodierunt e schola thomistica. Et quae aliunde ortum habent, plerumque deficiunt in methodo aut doctrina S. Thomae, vel et in accurata declaratione et demonstratione notionum et principiorum. Complures e moralistis magis attenti sunt practicis applicationibus, aut contenti recitare opiniones aliorum plus minusve probabiles; et pleraque eorum opera, nuperrime dictum fuit, exiguitate vel ipsa forma catechistica quaestionum et responsionum, minus adultam scientiae aetatem profiteri visa sunt.
Reditus ad doctrinam et methodum S. Thomae, qui fructus tam salutares habuit in metaphysica et dogmatica, non eodem gradu se extendit ad theologiam moralem, propter nocivum persistens divortium inter theologiam speculativam et practicam.
Quibus perspectis, non erit forsan ingratum e schola thomistica audire vocem quae, magis quam possit esse in aliquorum votis, scholastice et principaliter doctrinam exponat, intra limites tamen cuiusdam summae moralis.
Cum autem iterum iterumque affirmarent praedicto fini, quantumvis imperfecte et deficienter, respondere eas quas in collegio theologico Lovaniensi pro cursu elementari tradebamus praelectiones, has publici iuris iam facere intendimus.
Ad mentem sunt D. Thomae, Doctoris communis; et ad normam Iuris Novi, canonici atque civilis.
Ius Romanum ubique est abolitum, ipsumque in opere practico exponere potius generaret in mentibus confusionem quam scientificam utilitatem. Solum igitur ius spectamus hodiernum, imprimis gallicum, quod prius elaboratum et in patria nostra partim vigens, in multis fuit aliorum exemplar, licet recentissimi quidam codices videri possint aptius efformati atque perfectius. Pari modo Decretalia et Corpus Iuris relinquentes, solum codicem Iuris Canonici a Benedicto XV promulgatum respicimus, quin tamen ordinem eius sequendum eligeremus quia, quantumvis congruere scientiae iuris ipse possit, in quaestionibus tamen moralibus, ordini theologiae scientiae supremae cuncta sunt adaptanda et subordinanda. Faxit Deus, ut patrocinante B. Virgine cunctarum gratiarum mediatrice, in cleri institutionem atque utilitatem scholarum opus conferre possit. Romae, in Collegio Angelico, festivo die SS. Cordis, 27ª iunii 1930. Auctor.