Palladium theologicum, Tomus quintus: De virtutibus

D. AUGUSTINUS lib. 1. de doctrina Christiana, c. 23. quatuor enumerat Charitate diligenda. Unum supra nos, idest Deum; Unum, quod nos sumus; tertium iuxta nos, idest, Proximum; Quartum infra nos, idest, Corpus nostrum.

SUFFICIENTIA autem sumitur ex ipsius Charitatis natura; cum enim haec sit amicitia supernaturalis, consistens in communicatione vitae beatae, in qua quidem communicatione intervenit primo Deus, causa beatitudinis, et finis, cui omnia volumus bona. Secundo alii, quibus volumus bonum hoc beatitudinis, in quo communicemus: Et hi vel communicant, et participant directe, et sunt Homo, et Angelus; et hoc includit nos ipsos, et animas, et Angelos, qui sunt proximi: Vel participant indirecte per redundantiam, et haec sunt corpora nostra. Sic etiam D. Thomas loc. cit. ubi Malder. Sylvius, et Tanner. disp. 2. quaest. 3. dub. 1. Laym. lib. 2. tract. 3. cap. 3. Filliucius, tract. 28. num. 8. cum Richard. 3. dist. 28. art. 1.

SUMITUR etiam sufficientia diligendorum ex comparatione ad diligentem; nam diligens, aut habet respectum ad id, quod est supra se, nempe Deum; Vel ad se; vel ad consocios iuxta se, vel ad id, quod infra se; et hoc pacto non solum obiecta diligibilia recensentur, sed etiam ordo dilectionis.

OBIICIES primo, Quae sunt eiusdem speciei, faciunt unum; sed nos, et proximus sumus tales: Ergo.

RESPONDet S. Doct. esse unum natura, tamen primo Charitatem movere nos propter nosmet ad beatitudinem: deinde respicere proximum in ordine ad beatitudinem; nam proximus est minus pertinens ad nos.

OBIICIES secundo. Scriptura satis enumerat diligibilia, Deum, et proximum.

RESPONDet S. Doct. in his praeceptis includi nos quoad animam, et corpus, ut ostendi quaest. 21. et 22.

OBIICIES tertio. Nihil est beatum, praeter tria, Deus per essentiam, animus per influentiam, et corpus per redundantiam, quae sunt tantum tria.

RESPONDet S. Bonav. Charitatem sua obiecta respicere ordinate. Est enim ordinatissima: ideo respicit primo nos, deinde quae iuxta nos sunt posita.

OBIICIES quarto. D. Ambr. in Gloss. in id Cant. 2. Ordinavit in me charitatem, sex recenset diligibilia: Deum, Nos ipsos, Parentes, filios et Fratres, Domesticos, ac Inimicos.

RESPONDet S. Doct. Ambrosium distinctione accidentali distinguere proximum, prout nobis coniunctus est; at D. August. distinguit iuxta ordinem Charitatis secundum se; ideo attenditur secundum differentias principales boni. Vide S. Doct. etiam dist. 29. dub. 3. litt.

OBIICIES quinto. Sicut diligendum est corpus nostrum; ita et proximi: Si ergo animus noster, et animus proximi distinguunt duo membra: Ergo et corpora.

RESPONDet S. Doct. corpora nostra, et proximorum, esse infra nos in eodem ordine; unde unum constituunt; animum vero nostrum, et animum proximi diverso modo se habere, quia unus est intrinsecus, alter extrinsecus in ratione charitatis.

OBIICIES sexto. Ex charitate diligendum est etiam id, quod est contra nos.

RESPONDetur, contineri id in proximo, qui tamen non diligitur, ut contra nos ratione culpae; sed ut iuxta nos ratione communicationis in vita beata.