Summa de Ecclesia

VERITATIS adversarii multipliciter nituntur infringere conclusionem praedictam, quorum quidam prae ceteris magis a fidei veritate exorbitantes asserunt quod Imperator vel princeps secularis aut populus sit iudex ordinarius summi pontificis. Quorum rationes sunt quae sequuntur.

Prima.¹ Papa non est magis exemptus a iurisdictione Imperatoris quam fuerit Christus inquantum homo mortalis fuit, sed Christus inquantum homo mortalis fuit subiectus iurisdictioni Imperatoris, ergo et per consequens Imperator est iudex ordinarius papae. consequentia videtur bona. maior etiam patet: quoniam Vicarius non est maior eo cuius est Vicarius, minor vero probatur auctoritate Christi dicentis Pilato Ioan. 19. Non haberes potestatem adversus me ullam nisi esset tibi datum desuper, etc. Ex quibus verbis manifeste colligitur quod Pilatus iurisdictionem habuit coactiuam super Christum.

Secundo sic. Ille est iudex ordinarius papae a quo papa habet super alias ecclesias principatum, sed papa ab Imperatore videtur habere huiusmodi principatum scilicet per privilegium Constantini Imperatoris concessum Romano pont. de quo habetur 96. c. Constantinus. ergo, etc.²

Tertio sic. Imperator fuit ordinarius iudex sancti Petri, ergo Imperator est iudex ordinarius papae. consequentia videtur evidens, quia papa non videtur magis exemptus quam fuit beatus Petrus. antecedens probatur: quia omnes apostoli quantum ad hoc quod essent subiecti vel non subiecti iurisdictioni Imperatoris fuerunt pares, sed beatus Paulus fuit subiectus iurisdictioni Imperatoris, quia ad Caesarem tanquam ad superiorem appellavit. ergo et beatus Petrus fuit subiectus eidem.³

Quarto sic. sicut in novo testamento potestas summi sacerdotis pendet immediate a Deo, sic etiam in veteri testamento praeeminentia summi sacerdotis fuit a Deo instituta, sicut patet Exo. 18. sed non obstante praedicta eminentia summus sacerdos in veteri lege potuit ab homine iudicari immo et deponi sicut patet de Abiathar qui erat verus et legitimus summus sacerdos et tamen fuit depositus et eiectus de summo sacerdotio per Salomonem non propter crimen haeresis, sed quia conspiraverat cum Adonia, ut patet 3. Reg. 1. et 2. ergo similiter in novo testamento summus sacerdos subiectus erit in casibus criminalibus potestati seculari.⁴

Quinto arguitur ex illo quod Leo papa scribit Imperatori Ludovico in c. nos. 2. q. 7. ubi ita inquit. Nos si incompetenter aliquid agimus in subditis iustae legis tramitem non seruavimus, vestro ac missorum vestrorum cuncta volumus emendare iudicio, ubi papa missorum ab Imperatore voluit subire iudicium. ergo videtur quod papa subdatur iudicio potestatis secularis.⁵