Summa de Ecclesia

Postquam de varietate, et distinctione statuum in ecclesia Dei quantum ad praesens nobis sufficere visum est locuti sumus, consequenter de varietate, et distinctione officiorum in ecclesia Dei aliquid differamus. Dicimus autem varietatem officiorum convenientissime in ecclesia esse. Tum maxime propter actionum necessitatem quae in ecclesia necessariae sunt. oportet autem ad diversas actiones diversos homines deputari ad hoc quod expedientius, et sine confusione omnia peragantur, ut supra in ca. 69. plenius declaravimus. Tum secundo propter commendandam Dei sapientiam, quae in distinctione ordinata rerum maxime relucet tam in naturalibus quam in spiritualibus. Quod significatur in hoc quod regina Saba videns ordinem ministrantium Salomoni non habebat ultra spiritum deficiens admirationem sapientiae ipsius. 3. Reg. 10. Tum tertio ad subveniendum humanae infirmitati, quia per unum non poterant omnia quae ad divina mysteria pertinebant expleri sine magno gravamine, et ideo describuntur diversi diversis officiis. Unde hac de causa dominus legitur Numeri. 11. dedisse Moysi septuaginta senes populi in adiutorium. Tum quarto ut via proficiendi hominibus amplior detur dum plures in diversis officiis distribuuntur ut omnes sint Dei cooperatores quo nihil divinius ut dicit Dionysius. Praeterea considerandum quod cum in diversis officiis esse dicantur qui ad diversas actiones sunt deputati, manifestum est officia distingui. Unde Is. h. ethi. dicit officium ab efficiendo dictum esse quasi efficium propter decorem sermonis una mutata littera. Videtur autem sub hac officiorum varietate primo comprehendi distinctio gratiarum quae ad actiones necessarias in ecclesia dantur, de quibus Apostolus ait. 1. ad Corin. 12. Divisiones gratiarum sunt idem autem spiritus alii quidem datur per spiritum sermo sapientiae alii autem sermo scientiae secundum eundem spiritum, alteri fides, id est constantia fidei inquit glos. in eodem spiritu: alii gratia sanitatum. i. curandi infirmos dicit glos. in uno spiritu: alii opera virtutum. i. miraculorum, dicit glo. alii prophetia, alii discretio spirituum, alii gratia linguarum, alii interpretatio sermonum. Haec autem omnia operatur unus et idem spiritus dividens singulis prout vult. Secundo vero sub diversitate officiorum etiam comprehendi videtur distinctio quae attenditur secundum diversas vitas. i. activae, et contemplativae, quarum distinctio accipitur secundum diversa operationum studia. Unde ut idem Apostolus ubi supra ait, divisiones operationum, aliud enim est studium operationis in Martha quae solicita erat et laborabat circa frequens ministerium quod pertinet ad vitam activam, aliud in Maria quae sedens secus pedes domini audiebat verbum illius, quod pertinet ad contemplativam, ut habetur Luc. 10. Tertio comprehenditur sub officiorum distinctione differentia ministeriorum, de quibus ait Apostolus ubi supra. Divisiones ministrationum sunt, quibus ut inquit glosa, alii aliis subserviant. Ad quod videtur pertinere varietas, et distinctio tam ordinum ecclesiasticorum quam dignitatum. Dicit enim beatus Isidorus quod officiorum plurima genera sunt, sed praecipuum id quod in sacris divinisque rebus consistit, de qua rerum distinctione beatus Isidorus in libro. 7. Etymol. ca. 12. et inducitur in ca. Cleros dist. 21. ita inquit. Generaliter autem clerici nominantur omnes qui in ecclesia Dei deserviunt quorum gradus, et nomina haec sunt ostiarius, psalmista, lector, exorcista, acolythus, subdyaconus, dyaconus, presbyter, episcopus. Ordo enim episcoporum quadripertitus est, idest in patriarchis, archiepiscopis, metropolitanis atque episcopis. Patriarcha graeca lingua summus patrum interpretatur, quia primum, id est apostolicum retinet locum. Et ideo quia summo honore fungitur tali nomine censetur sicut Romanus Antiochenus Alexandrinus. Archiepiscopus graeco vocabulo qui sit summus episcoporum, tenet enim vicem apostolicam, et praesidet tam metropolitanis quam caeteris episcopis. Metropolitani autem a mensura ciuitatum vocantur, singulis enim provinciis praeminent quorum auctoritati, et doctrinae caeteri sacerdotes subiecti sunt, sine quibus nil reliquis episcopis agere licet. Solicitudo enim totius provinciae ipsis commissa est. De distinctione vero ceterorum officialium quae in maioribus ecclesiis esse solent scilicet archidyaconi, archipresbyteri, primicerii, et thesaurarii, et eorum officiis idem beatus Isidorus describit in quadam epistola quae habetur in ca. Perlectis, distinct. 25. quorum cum nota sit distinctio ea commemorare supersedimus.