Summa de Ecclesia

¹

Ad versus aliqua quae dicta sunt, de praeminentia potestatis spiritualis supra secularem adversarii plurima obiiciunt. Et primo quod non praeeminet temporis antiquitate arguitur sic. Prius tempore fuit terrena potestas sive secularis quam sacerdotium: ergo potestas secularis procedit temporis antiquitate spiritualem, et non econverso. consequentia patet, antecedens ostenditur ex tribus. Primo ex eo quod dicit beatus Aug. 15. de ciui. Dei, quod Cayn ante diluvium fuit primus dominus inter homines, quo tempore nullum videtur fuisse sacerdotium. Secundo ex eo, quia regnum videtur incepisse in Nembroth Ge. 10. tempore legis naturae: quanquam post diluvium sacerdotium autem incepit in Aaron tempore legis scriptae, ut habetur Exod. 28. non est autem dubium quod tempus legis naturae praecessit tempus legis scriptae. Tertio ex eo, quod verum sacerdotium in Christo videtur incepisse, verum autem regnum electione divina longe ante incarnationem Christi, ut in Saule incepit, ut habetur, 1. Regum. 10. Et ita videtur quod potestas terrena sive secularis praecessit sacerdotium, et per consequens potestatem spiritualem.

²

³

Secundo quod potestas spiritualis non praeemineat seculari nobilitate originis arguitur sic. Quorum est una, et eadem origo nullum eorum alteri praeeminere videtur originis nobilitate, sed potestas spiritualis et secularis habent unam et eandem originem. 1. Deum dicente Apostolo ad Rom. 13. Non est potestas nisi a Deo. Propter quod subiungit. Qui potestati resistit, Dei ordinationi resistit. unde imperium et sacerdotium ex eodem principio prodierunt, in autenticis quo modo oporteat episcopos in principio col. ii. et ergo sequitur quod ex parte originis non sit aliqua praeeminentia unius potestatis ad aliam.

⁴

Tertio arguitur quod potestas spiritualis non praeemineat seculari dignitate, quoniam ut dicitur, 1. Petri. 2. Subiecti estote omni humanae creaturae propter Deum sive regi tanquam praeexcellenti. ubi beatus Petrus asserere videtur regalem potestatem caeteris potestatibus dignitate praecellere.

⁵

Quarto arguitur quod potestas spiritualis non praeexcellit maioritate auctoritatis: quoniam si eo quod potestas secularis regalis inungitur et benedicitur a potestate spirituali, spiritualis potestas est dicenda praeexcellere maioritate auctoritatis, sequeretur quod episcopus Hostiens. qui summum pontificem consecrat, maior auctoritate summo pontifice dicendus esset, quod non est verum: ergo nec in proposito nostro ratio facta militare videtur.

⁶

Quinto arguitur quod potestas spiritualis non praemineat seculari causalitate sic. Ambae istae potestates sunt immediate a Deo: ergo una earum causalitate non dependet ab alia. consequentia patet, antecedens est notum de potestate spirituali, de seculari vero habetur in c. Quaesitum. xxiii. q. iiii. ubi dicit Innocen. A Deo concessam esse imperialem potestatem propter vindictam noxiorum gladium fuisse permissum, et Dei ministerio esse datum.

⁷

Sexto arguitur quod spiritualis potestas non praemineat seculari maioritate iurisdictionis, ita quod eam errantem iudicare posset sic: Gloss. super illud psal. 50. Tibi soli peccavi, dicit sic. quia rex est omnibus superior, ideo tantum a Deo qui maior eo est, est puniendus. Si quis vero de populo errauerit Deo peccavit, et regi: rex vero non habet hominem qui eius facta diiudicet. ergo non videtur quod potestas spiritualis possit punire secularem potestatem, ut puta regem aut imperatorem.

Septimo arguitur quod potestas spiritualis non praeemineat seculari superioritate praelationis sive dominationis, sic. Non solvitur tributum per aliquem alicui nisi maiori, aut superiori. unde solutio tributi probatio esse videtur subiectionis, ut habetur tam ex ca. Magnum. xi. q. i. quam ex ca. ii. extra de censu. sed ecclesia solvit tributum Imperatori, ut in c. Si tributum xi. q. i. ergo videtur quod spiritualis potestas non terrenae superemineat maioritate praelationis sive dominationis, sed potius econverso. Octavo arguitur quod spiritualis potestas non superemineat seculari superioritate principatus, sic. Moyses qui fuit primus ductor populi Israel et quasi Imperator fuit superior quam Aaron qui erat summus pontifex populi Israel: ergo superior est principatus secularis quam spiritualis. consequentia videtur nota. antecedens vero patere videtur ex eo quod potestate Moysi Aaron electus est in sacerdotem secundum illud Exod. 24. Applica quoque tibi Aaron fratrem tuum cum filiis suis, ut sacerdotio fungatur mihi.