Summa de Ecclesia

¹ Contra hoc quod dictum est primo in superiori capitulo, quod fides Christiana catholica appellanda sit multipliciter arguitur. Primo sic, cognitio debet cognoscibili sive obiecto suo esse proportionata, non enim quodlibet quomodolibet cognoscitur. sed fides est cognitio Dei, qui non est universalis neque particularis, ut dicit August. in lib. de trini. ergo fides quae Dei cognitio est, non est dicenda universalis.

² Secundo sic, de singularibus non potest esse nisi singularis cognitio. unde singularium non est scientia, sed fide quaedam singularia facta tenemus, ut nativitatem Christi, passionem, resurrectionem, ascensionem, adventum ad iudicium, et huiusmodi: ergo fides non debet dici universalis, et per consequens nec catholica.

³ Tertio sic, ab eo quod est commune multis non debet proprium nomen alicui rerum imponi, cum nomen causa innotescendae rei imponatur: sed quaelibet traditio, vel secta proponit ea quae tradit, ut universaliter ab omnibus credenda vel observanda, ut universaliter vera: ergo non debet fides Christiana specialiter hoc sibi vendicare, ut vel catholica sive universalis nominetur.

Quarto⁴ sic. Idolatria ad omnes mundi angulos pervenit, sed fides Christiana non invenitur ad omnes mundi fines pervenisse, cum aliqui Barbari sint qui fidem Christi non cognoscant: ergo idolatriae secta magis debet dici catholica quam Christiana fides.

Quinto⁵ sic, quod non convenit omnibus, non debet dici universale, sed fides Christiana a multis non recipitur, dicente apostolo ad Rom. 10. Non omnes obediunt evangelio. Esa. etiam dicit.⁶ Domine quis credidit auditui nostro, gl. inquit aliquis sed non omnes, ergo inconvenienter fides Christiana catholica sive universalis nominatur.