Summa de Ecclesia

¹

EXPOSITA veritate intelligentiae sub qua accipiendae sunt auctoritates sanctorum patrum dicentes claves esse datas ecclesiae universali: iam restat respondere ad obiecta adversariorum, et iuxta numerum suppositionum illarum quibus veluti fundamentis usi sunt arguendo tot capitula, subiungemus respondendo rationibus eorum.

² In primis ergo respondentes ad primum praesuppositum dicimus quod falsum est quod dicunt, videlicet quod omnia dicta Petro et apostolis trahenda sunt ad ecclesiam ad intellectum quem adversarii praetendunt, videlicet quod conveniant communitati ecclesiae: quoniam multa sunt quae dicta sunt a Christo Petro et apostolis quae nullo modo convenire possunt ipsi communitati ecclesiae, nec etiam singulis fidelibus, non enim potest universali ecclesiae, aut aliis fidelibus convenire illud. Christus ait Petro Matth. 16. Beatus es Symon Bariona, quia caro et sanguis non revelavit, etc. ut est manifestum. Item nec potest trahi ad ecclesiam illud Luc. 22. Tu conversus confirma fratres tuos, etc. Item nec illud Ioan. ultim. potest trahi ad ecclesiam. Symon Ioan. pasce oves meas, etc. ecclesia enim grex est non pastor. Item nec potest referri ad ecclesiam illud Matth. 5. quod dictum est apostolis. Vos estis sal terrae, quod etc. ubi ut inquit Hylarius, et habetur in gl. conti. apostolorum designatur officium. Unde gl. ait. Sunt apostoli sal terrae id est hominum terrenorum qui amando terram terra vocantur, et Hieronymus. Sal dicuntur apostoli, quia per illos universum hominum conditur genus. Item nec potest referri ad ecclesiam illud Matth. 19. Amen dico vobis, vos qui secuti estis me in regeneratione cum sederit filius hominis in sede maiestatis suae, sedebitis et vos iudicantes duodecim tribus Israel, ubi licet ut dicit Aug. de civit. Dei, per numerum duodenarium significetur universa multitudo iudicantium: huiusmodi tamen non sunt omnes fideles, sed ut idem August. dicit: illi intelliguntur qui propter evangelium sua omnia diuiserunt et secuti sunt Christum. Item nec potest referri ad universam ecclesiam illud. Venite post me, et faciam vos fieri piscatores hominum, ut patet. Item nec illud potest convenire communitati ecclesiae. Luc. 22. Hoc facite in meam commemorationem, per quod verbum apostoli dicuntur effecti sacerdotes. Item nec potest toti communitati ecclesiae convenire illud Ioan. 20. etc. quorum remiseritis peccata, remittuntur eis: quoniam sicut supra sufficienter ostensum est. Potestas ligandi et solvendi a peccatis nec omnibus fidelibus nec ipsi communitati ecclesiae modo praedicto data est. Item nec illud Matth. 18. Quaecunque alligaveritis, etc. quoniam potestas haec non data est ecclesiae in omnibus membris eius: sed ut inquit gl. in episcopis et presbyteris, et ita non potest referri ad ipsam communitatem ecclesiae modo praedicto. Item nec potest ad communitatem ecclesiae referri illud Matth. ult. Euntes docete omnes gentes, etc. Clarissimum autem est quod officium docendi et baptizandi non committitur toti ecclesiae nec isti sunt actus qui omnibus fidelibus conveniant. Item nec illud Ioan. 20. Sicut misit me pater et ego mitto vos. Licet enim hoc apostolis dictum sit et successoribus qui dicuntur fungi legatione Christi, derisorium tamen videretur ad communitatem ecclesiae esse hoc referendum, ita quod Christus universalem ecclesiam miserit ad praedicandum, et sic de multis aliis. In sequenti vero capitulo ostendetur hoc idem de eis quae dicta specialiter leguntur Petro. Patet ergo falsitas suppositionis adversariorum dicentium quod omnia quae dicta sunt apostolis referenda sint ad ecclesiam tanquam toti communitati convenientia. Et ad probationem primam³ quando dicitur quod quae dicta sunt apostolis oportet intelligere de successoribus concedimus hoc maxime de pertinentibus vel ad officium apostolatus vel ad doctrinam veritatis, vel ad tolerantiam passionum. Quod ve-⁴ ro dicunt consequenter quod illud. Ego autem sum vobiscum, usque ad consummationem saeculi: promissum esse universae ecclesiae nullus ambigat: concedimus, sed ex hoc non sequitur quod ea quae dicta sunt apostolis pertinentia ad potestatem sive ad officium apostolicum sint communia ipsi toti communitati, sive universitati ecclesiae, sive omnibus fidelibus simul iunctis.

^{5 6} Ad secundam probationem cum dicitur quod ea quae dicta sunt Petro non habent illustrem intellectum, nisi cum referantur ad ecclesiam: respondetur quod hoc non est sic accipiendum quod talia dicta Petro ad auctoritatem sive potestatem clavium spectantia ipsi communitati ecclesiae conveniant in communi, ut adversarii praetendunt, quia ut supra ostendimus hoc non est possibile, sed intelligendum est sic quod illa quae dicta sunt Petro importantia auctoritatem aut potestatem non habent illustrem intellectum nisi etiam ad eius successores per totum ecclesiae decursum referantur, et hoc verissimum esse supra ostendimus. Ex quibus patet quod ratio adversariorum quae fundabatur super suppositione praedicta nulla sit cum falso fundamento innitatur.