Summa de Ecclesia

Quemadmodum fuere aliqui apostolici principatus inimici qui illum non a Christo sed ab hominibus institutum esse contra Christi evangelium assererent: ita etiam non defuerunt qui statum dominorum Cardinalium tam quo ad eius institutionem quam ad eius dignitatem impugnare ausi sunt. Sunt enim quidam qui illum non a Christo sed humana inventione asserunt introductum, negantes in ecclesia illum tantae fore dignitatis ut inter principalia ecclesiae membra veniat in ecclesiastica hierarchia connumerandus quod sequentibus rationibus fundare nituntur. Primo sic. De statu Cardinalium nulla mentio fit in scriptura sacra novi testamenti: ergo videtur quod non sit annumerandus inter alios perfectionis status in novo testamento a Christo institutos, consequentia videtur optima, et antecedens patet discurrenti per singulos divinos libros novi testamenti. Secundo sic. Nihil videtur institutum a Christo cuius nomen nec tempore Christi nec apostolorum legitur fuisse: sed nomen Cardinalatus nec Christi tempore nec apostolorum legitur fuisse ut patet: ergo status nomine Cardinalatus designatus non potest dici a Christo institutus. Tertio sic. Omnium ministrorum ecclesiae institutio est in veteri testamento figurata, et inchoata et in novo plenius consummata ut habetur in ca. decretis dist. 21. sed status Cardinalium nec praefiguratus nec inchoatus legitur in veteri testamento: ergo sequitur id quod prius. Quarto sic. Status Cardinalium nobis videtur institutus a beato Pontiano Papa qui fuit anno domini 221. ut historiae quaedam referunt: ergo sequitur quod non a Christo fuit constitutus. Quinto sic. Post dispersionem apostolorum non legimus quod beatus Petrus habuerit aliquos Cardinales assistentes sibi in regimine universalis ecclesiae: ergo videtur quod status Cardinalium nec a Christo nec a beato Petro fuerit institutus, consequentia patet. Sexto sic. Cardinalibus ex institutione eorum non videtur alia dignitas aut praerogativa attribuenda quam explicatur in institutione eorum, sed de beato Marcello qui fuit circa annos domini 304. legitur, quod constituit in urbe Romana 25. cardinalatus sive titulos cardinalium quasi dioeceses propter baptisma, et propter cimiteria ad sepeliendum martyres et propter poenitentes, et propter conversos ex gentilibus sed ista officia non transcendunt statum communem presbyterorum: ergo non videtur quod status Cardinalium debeat poni ita sublimis sicut dictum est. Septimo sic. Dignitas episcopalis est suprema in ecclesia. Unde beatus Dionysius ordine episcoporum dicit supremum in ecclesia et episcopi dicuntur summi sacerdotes et pontifices maximi, ut in ca. Cleros, dist. 21. ergo etiam dato quod sit dandus status Cardinalium, non tamen videtur quod debeat in honore praeferri caeteris episcopis, et archiepiscopis ac patriarchis. Octavo sic. Perfectio vitae spiritualis requiritur ad statum episcopalem ut supra dictum est, quia episcopo ut dicit beatus Diony. 5. ecclesi. hierar. attribuitur perfectio tanquam perfectori aliorum: haec autem perfectio non videtur requiri in Cardinalibus sicut nec in religiosis: ergo dato quod Cardinales sint in statu perfectionis non est dicendum quod sint in statu sublimiori quam episcopi.