Summa de Ecclesia

Amplius superest respondere ad rationes aliorum doctorum qui Christi membra tantummodo nominant eos qui in gratia gratum faciente existunt, et eorum qui dicunt universaliter universos fideles Christi ad membra Christi pertinere. Quorum solutio breviter expediri potest attenta declaratione quam de veritate huius rei fecimus circa cap. 55.

¹

Ibi enim tot dicta sunt, ut clare pateat responsio omnium rationum factarum. Primo enim rationes eorum qui asserunt ad membra Christi pertinere solos eos qui in gratia gratum faciente existunt procedunt de illis qui actu membra sunt vera, spiritu Dei vivificata, secundum quod Hugo de sancto Victore in secunda parte De sacramentis ecclesiam describit dicens: Ecclesia sancta corpus Christi est, vivificata spiritu et unita fide; et sic procedit dictum Apostoli. Si quis Christi spiritum non habet, non est eius, scilicet membrum, Roma. 8. Rationes autem aliorum procedunt de eis qui quocumque modo, sive vere et perfecte, sive aequivoce et imperfecte, ad unitatem corporis Christi pertinent. Primi sunt fideles iusti, qui charitatis copula Christo uniti sunt et vivunt de spiritu eius. Secundi sunt fideles peccatores, qui unitate fidei informis uniuntur corpori ecclesiae, sicut copiose superius est ostensum; alias etiam circa cap. v. data est alia divisio, videlicet quod esse de ecclesia dicitur dupliciter: aut numero et merito, sicut sunt iusti, de quibus procedunt primae rationes; aut numero solum, sicut fideles peccatores, quo modo conceduntur rationes aliorum. Vel sumendo aliam viam sancti Tho. in tertia parte, de qua supra fecimus mentionem, quod aliqua sunt membra actu et aliqua potentia: primae rationes concedendae veniunt de his qui membra actu sunt; secundae vero de his qui in potentia sunt membra.