Summa de Ecclesia

¹

Ut autem veritas eorum quae circa claves ecclesiae diximus illustrior fiat, inducemus obiectiones quorundam contra quasdam conclusiones positas in praecedenti c. videlicet sextam, decimam, et duodecimam. Contra sextam in qua ponitur quod claves ordinis, et character sacerdotalis non distinguntur essentialiter, sed solum per relationem ad diversos actus; arguitur primo sic. Illa distinguntur essentialiter ab invicem quorum unum potest esse sine alio, sed sacerdotalis character potest esse sine potestate clavium, sicut patet in apostolis quibus in coena domini per verba illa. Hoc facite in meam commemorationem, data est potestas conficiendi corpus Christi, sed potestas clavium data est post resurrectionem cum dictum est illis. Quorum remiseritis peccata remittuntur eis. ergo necessarium est dicere quod potestas clavium distinguitur essentialiter a charactere sacerdotali. Secundo sic. Illa quae diverso tempore infunduntur aut generantur distinguntur necessario, sed character sacerdotalis et potestas clavium infunduntur diversis temporibus: ergo necessario distinguuntur. maior est Arist. in Topi. minor patet ex argumento praecedenti ubi inductum est quod character sacerdotalis datus est in coena apostolis, potestas vero clavium post resurrectionem Christi. Tertio sic. Ista separantur in quolibet sacerdote: ergo distinguuntur. consequentia patet, et antecedens probatur, nam sacerdote nunc ordinato prius episcopus dicit. Accipite potestatem celebrandi missam tam pro uiuis quam pro defunctis, dans ei calicem. Et quibusdam interpositis ponens manus super caput eius dicit. Accipite spiritum sanctum, et quorum remiseritis peccata remittuntur eis, vel remissa erunt etc.

²

Quarto sic. Christus habuit clavem ligandi, et solvendi (secundum illud Apoc. 3. Haec dicit qui habet clavem David) et non habuit characterem sacerdotalem cum nihil susceperit a sacramentis. ergo necessario distinguntur claves a charactere.

³

Quinto sic. Si claves essent idem quod character sacerdotalis, sequeretur quod sicut omnes sacerdotales aequaliter habent characterem sacerdotii, omnes aequaliter haberent claves, quod non videtur verum cum de beato Petro dicatur in gl. Math. 16. quod prae ceteris dotatus fuerit clavibus regni coelestis.

⁴

Sexto sic. Scismatici, haeretici, et excommunicati possunt conficere, et conficiunt, non autem possunt absolvere vel ligare, ut in c. audivimus et in c. miramur xxiii. q. 1. ergo haec duo scilicet character sacerdotalis, et potestas clavium essentialiter distinguntur.

⁵

Secundo principaliter arguitur contra conclusionem decimam in qua dicitur quod claves ordinis non distinguuntur ab invicem realiter. Arguitur primo sic. Omnia illa quae contingit separari subiecto non sunt unum et idem in essentia: sed sic est quod istas claves contingit separari subiecto: ergo necessario realiter sive essentialiter distinguntur. maior est nota. minor probatur, quoniam contingit quod papa committat aliquibus quod causam aliquam discernant, absque hoc quod super ea ferant sententiam, immo mandabit quod ad eum referant sive remittant. Ecce quod tales habebunt potestatem discernendi non autem diffiniendi, et ita hae duae potestates possunt separari subiecto.

⁶

Secundo sic Math. 16. Christus Petro de clavibus loquens ait. Tibi dabo claves regni coelorum. ubi gl. dicit. Claves sunt scientia discernendi et potentia qua iudex ecclesiasticus dignos debet recipere, et indignos excludere a regno. Illa autem quae pluraliter dicuntur non videntur in una essentia convenire. ergo etc.

⁷

Tertio sic. Omnia illa quorum unum augetur et minuitur altero permanente immobili necessario realiter distinguntur: sed sic est quod scientia discernendi est in aliquibus maior et in aliquibus minor manente aequali potestate ligandi et solvendi: ergo istae duae claves realiter distinguntur.

⁸

Tertio principaliter arguitur contra conclusionem duodecimam et eius corollarium in quibus ponitur quod claves ordinis sive potestas ligandi, et solvendi ita solis sacerdotibus in ecclesia conveniant quod non universitati ecclesiae. Primo sic. Claves regni coelorum sunt datae universali ecclesiae: ergo non solis sacerdotibus. consequentia videtur nota: quoniam universalis ecclesia cum sit collectio omnium fidelium, ut in c. ecclesia dicitur de conse. dist. 1. non est solum sacerdos. antecedens est Aug. li. de doct. Christiana c. 14. dicentis quod has claves dedit Christus ecclesiae, ut quae solveret in terra, soluta essent in coelis et quae ligaret ligata essent. et similis sententia habetur ab eodem Aug. in multis aliis locis tam supra Io. quam in li. de Agone Christiano, et non potest dici quod non loquatur de clavibus ordinis cum istae directe, et immediate respiciunt regnum coelorum, ut dictum est.

⁹

Secundo contra id quod dicitur quod solus sacerdos evangelicus claves habeat, arguitur sic. Claves sicut dictum est sunt duae, scilicet scientia discernendi, et potestas iudicandi, sed utrumque sacerdos legalis habebat ut patet: ergo etiam sacerdos legalis habebat claves. Et confirmatur. Sacerdos legalis habebat aliquam potestatem super reliquum populum non temporalem, quia sic potestas regia non fuisset distincta a sacerdotali: ergo spiritualem, sed haec est clavis, ut dictum est: ergo non solus evangelicus sacerdos, sed etiam legalis claves habuit.