Summa de Ecclesia

QUIDAM adversariorum de ordine presbyterorum curatorum, plusquam oportet ut videtur, sapere volentes, ita statum presbyterorum curatorum extollere praesumpserunt ut illorum statum, et illos a Christo immediate institutos esse assererent, ita ut illorum iurisdictio et auctoritas nec a Papa nec ab episcopis in aliquo dependeret. Pro qua parte Ioannes de Poliacho quodlibeto 5. quaest. 14. ita arguit.¹ Sacra scriptura statum curatorum dicit esse institutum, et ipsos a Christo² quia accipio tanquam manifestum quod status in quo est potestas et iurisdictio continuatur in diversis temporibus ab illo a quo fuit institutus a principio cui institutus fuit, et conservatur in omnibus temporibus sequentibus.³ Et quod successor eius in aliqua dignitate⁴ officio aut statu ab illo eodem instituitur in illo in quo antecessor institutus est cum in eodem statu succedat quasi eadem persona, sicut patet per iurisdictionem in omnibus balivis praepositis prioribus, et magistris ordinum et sic de aliis alias successor nullo modo censeretur quasi eadem persona cum antecessore: sed status, et potestas, et iurisdictio septuaginta duos discipulorum⁵ continuatur in sacerdotibus curatis sicut status apostolorum et potestas et iurisdictio in episcopis, succedunt sacerdotes curati discipulis septuaginta, sicut episcopi succedunt apostolis dicente glo. Luc. 10. Sicut in apostolis forma est episcoporum. sic in 72. forma presbyterorum⁶ secundi ordinis. Ergo sequitur quod ab ipso eodem⁷ a quo status discipulorum fuit institutus a principio modo est institutus status curatorum. Et a quo fuerunt instituti discipuli⁸ sunt instituti curati habentes auctoritatem, et iurisdictionem ab illo eodem a quo et 72. discipuli. Sed status discipulorum a Christo⁹ est institutus, et ipsi ab eo instituti, et misit potestatem immediate ab ipso Christo accipientis non ab aliquo apostolorum sicut nec alii apostoli. Discipulis enim simul et plurimis potestatem¹⁰ praedicandi, et potestatem in clavium contulit utrisque quando dixit. Sicut misit me pater et ego mitto vos¹¹, scilicet ad praedicandum. Et postea. Quaecunque remiseritis etc. quo ad potestatem ligandi, et solvendi. Item Matth. ultimo in fine dicit¹² dominus in monte Galilaeae parum ante ascensionem. Euntes igitur docete omnes gentes. Ecce quod eis dat officium praedicandi. Baptizantes eos in nomine patris, et filii et spiritusancti. Ecce potestatem baptizandi dat eis. Item Marc. ult. Euntes in mundum¹³ universum praedicate evangelium omni creaturae. Sequitur postea. Illi autem profecti praedicaverunt ubique domino cooperante, et sermonem confirmante sequentibus signis. Forte dices quod ibi non fuerunt 72. discipuli quando hoc dixit apostolis, immo fuerunt et negare hoc videtur manifeste haereticum, et contra sacram scripturam quae alias salvari non potest. Unde Act. 1. quando reversi fuerunt de monte oliveti, unde Christus ascendit, dixit Petrus. Oportet ex his viris qui nobiscum sunt congregati omni tempore quo Christus intravit, et exivit dominus Iesus inter nos incipiens a baptismate Ioannis usquequo assumptus est a nobis testem resurrectionis eius, fieri unum ex istis, et statuerunt duos Ioseph, et Mathiam, qui fuerunt de 72. discipulis. Ergo ipsi et alii discipuli fuerunt in ascensione Christi cum interato misit eos ad praedicandum, et baptizandum: immo si debeat illa scriptura verificari oportet eos 72. discipulos fuisse semper cum Christo, sicut et 12. ergo apostoli et discipuli sunt immediate instituti a Christo et ab ipso receperunt sine medio potestatem. Ergo et status curatorum et ipsi sunt immediate a Christo instituti, et ab ipso immediate potestatem habent. Status enim istorum non est alius¹⁴ et alius, sicut status isti non sunt alii quam erant ante centum annos, sed est unus status continuatus a Christo semper, et potestas data illis a Christo est continuata in istis. Quare enim potestas collata Petro¹⁵ continuata est in Romano pontifice, et potestas collata aliis apostolis non est continuata in aliis episcopis, et potestas collata in discipulis non est continuata in curatis, non potest ratio dari. Et ideo curati sunt veri ordinarii¹⁶ habentes iurisdictionem ordinariam non iure humano sibi datam sed a Christo immediate in prima institutione ecclesiae in qua hos duos ordines, et solum illos instituit, et etiam non sunt vicarii episcoporum sed Iesu Christi ab ipso instituti, inferiores tamen et minores episcopis, nec ab ipsis possunt destitui nisi ex rationabili causa sicut nec episcopi a papa, cum non sint eorum vicarii sed Iesu Christi. Item episcopi habent inferiorem potestatem¹⁷ a Deo immediate sub papa sed non a papa, quia tunc sede papali vacante potestas in praelatis inferioribus periret, sicut sensus abscisso capite deficiunt in ceteris membris. Et si ita esset adhuc manifestius¹⁸ constaret quod episcopus ordinarius tempore vacationis nullam haberet potestatem: et cum illa vacatio posset durare in multis annis, sequeretur quod potestas ecclesiae totaliter deperiret quod nepharium est dicere. Consimiliter potest argui quod curati suam potestatem non habent nec a papa nec ab episcopis, ergo etc. Ex quo patet quod nec papa a praelatis potest potestatem datam a Christo eis auferre et aliis non praelatis dare, nec statum ecclesiae a Christo institutum destruere, et mutare cum sit eis data potestas in aedificationem non in destructionem, sicut ait Apostolus 2. Corinth. 10. Et hoc pulchre dicit Urbanus Papa 25. quaest. 1. sunt quidam, ubi sic dicit. Inde novas leges condere potest Romanus pontifex ubi evangelistae aliquid nequaquam dixerunt. Ubi vero dominus vel eius apostoli, et eos sequentes sancti patres sententialiter aliquid diffinierunt ibi nec novam legem Romanus pontifex dare potest sed potius quod praedicatum est usque ad animam et sanguinem confirmare debet etc.