Summa de Ecclesia

SATIS facile intelligere ex iam dictis est quam longe a veritate, et a statu salutis oberrent, qui dicunt non esse obediendum statutis papalibus. Contra quod praeter ea quae in superioribus dicta sunt est Leo papa, qui ita in cap. hoc distinct. 11. ait. Hoc vestrae indicimus charitati ut ab apostolicis institutis nullo ulterius recedatis excessu, quia inultum post hoc esse non poterit si quisquam apostolicas regulas in aliquo crediderit negligendas. Item est beatus Greg. in cap. praeceptis, distinct. 12. ita dicens. Praeceptis apostolicis non dura superbia resistatur, sed quia obedientiam quae a sancta Romana ecclesia, et apostolica auctoritate iussa sunt salubriter impleantur eiusdem sanctae Dei ecclesiae quae est caput nostrum communionem habere desideratis. Item Pius Papa omnibus ecclesiis scribens sic inquit. Instruimus vos apostolica auctoritate omnes eadem servare debere quae et nos servamus, nec debetis a capite quoquo modo dissidere. Christus enim hanc apostolicam sedem omnium ecclesiarum caput esse praecipit, ipso dicente principi apostolorum Petro. Tu es Petrus, et super hanc petram aedificabo ecclesiam meam, etc. haec ille. Item ad idem est beatus Calixtus papa, qui omnibus episcopis scribens ita ait. In cap. non decet distin. duodecima. Non decet a capite membra dissidere, sed iuxta sacrae scripturae testimonium omnia membra caput sequantur. Nulli enim dubium est quod apostolica ecclesia mater sit omnium ecclesiarum, a cuius regulis nullatenus convenit deviare, haec ille. Item in cap. Si quis dogmata 22. quaest. 2. Nicolaus papa universali synodo praesidens ita ait. Si quis dogmata, mandata, interdicta, sanctiones vel decreta pro catholica fide et ecclesiastica disciplina pro correctione imminentium vel futurorum malorum a sedis apostolicae praesule salubriter promulgata contempserit, anathema sit. Praeterea dicere quod fideles non teneantur apostolicae sedis mandatis sive constitutis obedire, sit erroneum sive haereticum patet, quia hoc ipso negant Romanum pontificem esse caput ac rectorem sive pastorem ecclesiae, quod ut in superioribus monstratum est evangelio contradicit, et per consequens haereticum. Unde sanctus Thom. in probatione huius in tractatu contra impugnantes religionem ait sic. Dicitur in decretis distinct. 22. in c. omnes. Qui autem Romanae ecclesiae privilegium ab ipso summo omnium ecclesiarum capite traditum auferre conatur, hic proculdubio in haeresim labitur. Et infra. Fidem quidem violat qui adversus illam agit quae est mater fidei. Hoc autem privilegium Christus Romanae ecclesiae contulit, ut omnes illi sicut Christo obediant. Unde Cyrillus lib. thesaurorum. Ut membra maneamus in capite nostro apostolico throno Romanorum pontificum, a quo nostrum est quaerere quid credere et quid tenere debeamus, ipsum venerantes, ipsum rogantes pro omnibus, quoniam ipsius solum est reprehendere, corrigere, statuere, disponere, solvere et loco eiusligare qui ipsum aedificavit, et nulli alii quod suum est plenum, sed ipsi soli dedit, cui omnes iure divino caput inclinant et primates mundi tanquam ipsi domino Iesu Christo obediunt. Unde patet quod quicunque dicit non esse obediendum in his quae per papam instituuntur in haeresim labitur. Haec sanctus Thom. Ex his manifeste patet quam rationabiliter in concilio Constantiensi damnatus fuit error ille Ioan. Hus dicentis quod obedientia ecclesiastica est obedientia secundum adinventionem sacerdotum ecclesiae praeter expressam auctoritatem scripturae.