Summa de Ecclesia

QUOD vero beatus Petrus non solum aliorum apostolorum princeps fuerit, sed in totum Christianum orbem principatum, et praelationis habuerit auctoritatem, tam sacrarum scripturarum testimoniis quam rationibus efficacibus facile ostendemus. Imprimis ex eo quod Mat. 16. inquit dominus. Tu es Petrus, et super hanc petram aedificabo ecclesiam meam, et tibi dabo claves regni caelorum. Quod verbum beatus Chrysostomus super Math. pertractans ita inquit, prout inducit sanctus Thom. Filius quod patris est et ipsius filii potestatem Petro universaliter concessit ubique terrarum et homini mortali omnium quae in caelo sunt dedit auctoritatem, dando ei claves ad hoc ut ecclesiam ubique amplificet. Item super Actio. apostolorum idem beatus Chrysostomus ita propositum optime confirmat. Petrus apostolus a filio super omnes qui filii sunt, potestatem accepit non ut Moyses in gente una sed in universo orbe. Secundo idem trahitur ex illo Ioan. ulti. ubi Christus Petro ait. Symon Ioannis pasce oves meas inter has et illas non distinguens, sed universas eius curae commendat. Unde beatus Chrysostomus exponens hoc verbum sic ait. Pasce oves meas, id est loco mei praepositus, et caput esto fratrum, ut ipsi te in loco meo assumentes ubique terrarum te in throno tuo sedentem praedicent, et confirment. Tertio idem ostenditur ex illo Ioan. etiam ulti. c. ubi Christus ait Petro. Sequere me. Quod verbum non tam intelligi debet de genere martyrii quam de ordine magisterii. Nam et Andreas, et quidam alii praeter Petrum in crucifixione secuti sunt Christum, sed solum sibi Petrum substituit dominus, et in officio vicarium et in martyrio successorem. Unde sanctus Thom. exponens hunc locum de utroque dicit, vel secundum Chrysostomum. Sequere me in praelationis officio, q. d. sicut ego habeo a Deo patre curam ecclesiam psal. 2. Postula a me et dabo tibi gentes etc. ita tu loco mei sis supra totam ecclesiam. Unde Theophilus super eodem verbo inquit. Per hoc quod dominus ait Petro, sequereme, cunctorum fidelium praelatum eum instituit. Et beatus Bern. ad Eugenium lib. 2. de consideratione cap. 6. ex hoc loco evangelii amplitudinem principatus apostolici probans ita illi inquit. Tu es cui traditae sunt claves regni caelorum, cui oves traditae sunt. Sunt quidem et alii caeli ianitores, et gregum pastores, sed tu tanto gloriosius quanto et differentius utrunque prae ceteris haereditasti. Habent alii assignatos greges singuli singulos tibi universi crediti sunt, unus uni nec modo ovium sed et pastorum, tu unus omnium. Unde illud probetur quaeris, ex verbo domini cui non dico episcoporum sed apostolorum etiam sic absolute et indistincte totae commissae sunt oves. Si me inquit amas, pasce oves: quas? illius vel illius populi civitatis aut regionis aut certe regni? oves inquit meas cui non planum non designasse aliquas sed assignasse omnes? nihil excipitur ubi dicitur nihil, et forte praesentes ceteri discipuli erant cum committens ecclesiam uni unitatem omnibus commendaret in uno grege in uno pastore secundum illud. Una est columba mea formosa mea perfecta mea, ubi unitas ibi perfectio, reliqui numeri perfectionem non habent sed distinctionem recedentes ab unitate. Inde est quod alii singulas sortiti sunt plebes scientes sacramentum. Denique Iacobus qui vocatur columna ecclesiae una contentus hyerosolymitana Petro universitatem cedens. Pulchre vero ibi positus est suscitare semen defuncti fratris ubi occisus est ille. Nam dictus est frater domini, porro sedente domini fratre quis se ingerat alter praerogativae Petri? ergo iuxta canones tuos alii in partem solicitudinis, tu in plenitudinem potestatis vocatus es etc. Quarto eadem sententia colligitur ex illo Ioan. in eodem cap. ubi solus Petrus super mare venire iussus est, per quod dabatur intelligi, quod totum mundum per mare designatum sub una ditione obtineret. Unde beatus Bern. ubi supra ita praefato pontifici subinfert. Accipe illud quod nihilominus praerogativam tuam confirmat. Discipuli navigabant, et dominus apparebat in littore, sciens Petrus quia dominus est in mare se misit, et sic venit ad ipsum aliis in navigiis venientibus. Quid illud est? nempe signum singularis pontificii Petri, per hoc non navim unam ut ceteri quisque suam, sed saeculum ipsum susceperit gubernandum. Mare enim saeculum, naves ecclesiae. Hinc est etiam quod altera vice instar domini gradiens supra aquas unicum se Christi vicarium designavit, qui non uni populo sed cunctis praeesse deberet, siquidem aquae multae populi. Itaque cum quibusque ceterorum sua tibi una commissa est navibus facta ex omnibus ipsa universalis ecclesia toto orbe diffusa. Haec Bern. Quinto pontificatus apostolici universitas ostenditur ex eo quod consequenter in eodem evangelio Ioannis sequitur, ubi legitur Petrus solus ascendisse, et traxisse rete in terram plenum magnis piscibus. Super quo beatus Greg. rationem assignans huiusmodi inquit. Ipsi enim sancta ecclesia est commissa, ipsi dicitur spiritualiter, pasce oves meas. Hoc autem ipse nunc praefigurat in opere, nam pisces ad soliditatem littoris pertrahit, quia stabilitatem aeternae patriae fidelibus ostendit. Sexto idem ostenditur ex illo Act. 10. ubi soli Petro ostensum est lintheum submissum de caelo, et super eum solum submissum, in quo erant omnia quadrupedia, et serpentia terrae, et volatilia, et sibi soli dictum est de omnibus illis animalibus. Surge Petre occide, et manduca. Quod lintheum nemo ambigit universum mundum cum cunctis hominibus diversorum ri- tuum designare. Nec dubium quin occidere, et manducare non aliud erat quam perversos mores in ipsis praecindere, et eos in suam personam toti incorporare ecclesiae, ut satis colligitur ex glo. interli. Unde et beatus August. tractans hoc verbum super illud psalm. 30. Potabunt omnes bestiae agri, ad propositum nostrum de extensione principatus Petri in omnes homines fideles quarumcunque nationum ita loquitur. Quattuor enim linteis vas submissum est de caelo Petro ubi erant omnis generis animalia, et sonuit ei vox. Surge Petre macta, et manduca, omnes enim mactat Petrus in eo quod mali sunt, et manducat in corpus ecclesiae traiiciendo. Et infra. Omnes enim erant in archa, omnes in disco, omnes mactat Petrus, et manducat omnes. Haec August. Septimo hoc idem ostenditur ex illo quod ecclesia per totum orbem in festo beati Petri apostoli dicit ad Petrum. Tu es pastor ovium princeps apostolorum, tibi tradidit Deus omnia regna mundi. Octavo ex illo quod in eadem historia fertur dominus dixisse Petro. Symon Petre antequam de navi vocarem te novi te et super plebem meam principem te constitui. Plebs autem Christi tota universalis ecclesia dicitur. Relinquitur ergo ex inductis sacrae scripturae testimoniis clarissimum, quod beatus Petrus fuit, et nunc eius successor habet auctoritatem praelationis super totam ecclesiam Christi, ut veraciter sit servus ille de quo dicit Christus Luc. 12. Fidelis servus et prudens quem constituit dominus super familiam suam, glo. dicit, id est ecclesiam. Nono hoc idem ostenditur ex concilio calcedonen. quod sanctus Thomas in tractatu contra errores Graecorum in c. 67. inducit ad hoc probandum, scilicet quod praedictus Christi vicarius in totam ecclesiam universalem praelationem obtineat. Legitur enim in calcedonen. concilio quod tota synodus Leoni papae acclamavit. Leo sanctissimus apostolicus et Ycomenicus, id est universalis patriarcha, per multos annos vivat. Item inducit Cyrillo super Ioan. dicens. Iacobum localiter in loco terminat, Petrum autem totius orbis ordinat magistrum et doctorem. Hoc etiam ratione sic ostenditur. Princeps lex et finis videntur sic commensurata ut sibi invicem pares sint uniuersalitatis et extensionis principatum, scilicet regulativum, medium quo, et finis ad quem, sed sic est quod lex evangelica secundum quam pontifex ecclesiasticus regit ecclesiam, et finis quem intendit in regimine ecclesiae ipse princeps ecclesiasticus, scilicet suprema beatitudo se extendit ad omnem hominem fidelem, ad omnem sexum, et ad omnem statum. Ergo ad omnes fideles cuiuscunque conditionis et status existant congregatos simul localiter sive dispersos per orbem extenditur auctoritas regiminis et administrationis summi pontificis. Ex quibus apertissime convincitur error dicentium beatum Petrum sive Romanum pontificem non habere primatum sive principatum super totam ecclesiam. De cuius erroris gravitate beatus Thom. contra errorem Graecorum in ca. 66. ita loquitur. Similis autem error est dicentium Christi vicarium Romanae ecclesiae pontificem non habere universalis ecclesiae primatum, errori dicentium spiritum sanctum a filio non procedere. Ipse enim Christus Dei filius suam ecclesiam consecrat, et sibi consignat spiritu sancto quasi suo caractere et sigillo, ut ex suprapositis auctoritatibus manifeste habetur, et similiter Christi vicarius suo primatu et providentia universalem ecclesiam tanquam fidelis minister Christo subiectam conservat. Haec sanctus Thom.