Summa de Ecclesia

Sane praemissis attente consideratis manifeste cognoscere possumus ut ipsa pluralitas actionum quae in ecclesia necessaria sunt penes quas officiorum distinctio ut praedictum est, sumpta est, plures arguat necessarias in Republica Christiana potestates esse. Cum enim potestas sit agendi, necesse est ut in ecclesia in qua plures, et variae sunt actiones plures fateamur esse potestates. Dicit enim Aristot. de somno et vigilia quod cuius est actus, eius et potentia. Plane quemadmodum ut supra cap. 69. explanavimus fidelium universitas duos in generali complectitur ordines, laicos scilicet et clericos quasi duo latera corporis unius: ita in generali duae in ipsa fidelium universitate sunt potestates, scilicet secularis, et spiritualis, ut magister Hugo de sancto Victore in libro de sacramentis parte 2. inquit. In laicis quippe ad quorum studium, et providentiam ea quae terrenae vitae necessaria sunt pertinent, potestas est terrena. In clericis vero ad quorum studium spectant ea quae spiritualis vitae sunt bona, potestas est divina. Illa ergo potestas secularis dicitur, ita spiritualis nominatur. Quarum potestatum figura in veteri testamento praecessisse videtur. 3. Regis 7. ubi dicitur, quod statuit Salomon duas columnas aereas in porticu templi, cumque statuisset columnam dextram vocavit eam nomine Ioachim, similiter erexit columnam secundam, et vocavit eam nomine Booz. Ad horum autem mysticum verborum intellectum declarandum sciendum est ecclesiam militantem significari per atrium, triumphantem vero per templum domini. Cuius ratio est, quoniam sicut per atrium intratur ad templum: ita de militante ecclesia transitur ad triumphantem. Salomon autem noster sapientissimus Dei, scilicet filius, in quo sunt omnes thesauri sapientiae, et scientiae absconditi, ad Colos. 2. duas columnas, id est duas potestates, spiritualem scilicet et temporalem, posuit in atrio sive in porticu templi, id est in ecclesia militante, quibus tanquam columnis respublica Christiana fulciretur, et firmaretur. Quoniam autem spiritualia temporalibus praeferuntur, spiritualis potestas digne per dexteram columnam accipitur, temporalis vero per columnam sinistram designatur. Recte autem columnae primae scilicet potestati spirituali impositum est nomen Ioachim, quod interpretatur praeparans aliis firmitatem, per quod designatur excellentia spiritualis potestatis: quia nisi omnibus virtutibus emineret potestatibus aliis firmitatem non praepararet. Unde Petro qui plenitudinem spiritualis potestatis vocatus est, dictum est a Christo. Et tu aliquando conversus confirma fratres tuos. Consequenter est notandum quod in huiusmodi potestatibus ut inquit praefatus venerabilis Hugo de sancto Victore, diversi sunt gradus, et ordines potestatum: sub uno tamen capite utrinque distributi, et quasi ab uno principio deducti, et ad unum relati. Terrena enim potestas caput habet regem, spiritualis potestas caput habet summum pontificem. De quibus potestatibus Pelagius Papa Anastasio Imperatori ita scribit in cap. Duo sunt distinct. 86. Duo sunt quippe Imperator Auguste quibus principaliter hic regitur mundus, auctoritas sacra pontificum, et regalis potestas. Gradus vero et ordines differentes in potestate seculari sive terrena capiuntur tam ex veteri testamento quam ex novo. Ex veteri quidem primo patet Exod. 17. ubi dicitur quod Moyses ex electis viris strenuis de cuncto Israel constituit eos principes populi tribunos, et centuriones, et quinquagenarios, et decanos qui iudicarent populum Dei omni tempore. Ex novo quidem testamento accipiuntur primo ubi apostolus inquit ad Roman. 13. Omnis anima potestatibus sublimioribus subdita sit, ubi inquit glos. ut etiam serviat homo potestatibus secularibus bonis vel malis, scilicet regibus principibus tribunis centurionibus, et aliis huiusmodi. Secundo accipitur ex illo ubi beatus Petrus apostolus ait 1. Petri 2. Subditi estote omni humanae creaturae propter Deum sive regi tanquam praecellenti, sive ducibus tanquam ab eo missis. Gradus vero et ordines in spirituali potestate etiam tam ex veteri testamento quam ex novo designantur. De veteri quidem patet Numeri 3. cap. ubi ponitur gradus summi sacerdotis Aaron, et minorum sacerdotum subministrantium Aaron ubi dicitur. Sumptique sunt sacerdotes Eleazar, et Ithamar coram Aaron. Item ponitur ibi subministratio Levitarum secundum gradus differentes, unde ubi dicitur. Dabis levitas Aaron, et filiis eius quibus traditi sunt a filiis Israel in ministerio. In novo quidem testamento etiam gradus in potestate spirituali describuntur. Primo ubi gradus summi pontificis ordinatur cum plenitudo potestatis clavium uni singulariter, scilicet Petro committitur dicente domino illi. Tu es Petrus, et super hanc petram aedificabo ecclesiam meam etc. Matth. 16. Item cum eidem cura gregis dominici universalis iniungitur dicente domino illi. Symon Ioannis diligis me plus his? Pasce oves meas. Ioan. ult. cui in ecclesia Romanus pontifex in primatu succedit. Secundo differentia gradus episcoporum designatur in apostolis quorum locum tenent episcopi, quibus a domino dicitur. Amen dico vobis quaecunque ligaveritis super terram erunt ligata etc. Matth. xviii. Gradus vero presbyterorum accipitur cum dominus discipulos 72. qui minoris ordinis sacerdotum figurarum gesserunt, designasse legitur, qui eum praecederent in omnem civitatem, et locum quo erat ipse venturus. Matth. 10. Sub potestate vero presbyterorum ordo Dyaconorum, qui in Archidyaconis habent iudiciariam potestatem designatur. 1. Thimo. 3. ab Apostolo, ubi post descriptionem episcopi dicit. Dyacones si bene administraverint bonum gradum sibi acquirunt.