Summa de Ecclesia

Consequenter contra id quod de ecclesia dictum est quod catholica sit, etiam arguitur multipliciter et primo sic.¹ Tempore quo apostoli condiderunt symbolum, neque fides nec ecclesia erat per totum orbem diffusa: ergo sequitur quod ecclesia Christi non est dicta catholica illa ratione, quia scilicet per orbem totum extensa. Consequentia patet, antecedens etiam ostenditur ex eo quod antequam per orbem ad praedicandum apostoli diffunderentur symbolum condiderunt in quo tunc iam affirmaverant ecclesiam esse catholicam. Secundo² sic, una et eadem est eccle- sia quae fuit apud patres veteris testamenti et quae apud nos est in novo testamento sed ecclesia antiquo tempore veteris testamenti non dicebatur catholica, cum in sola Iudaea notus esset Deus psal. lxxv. ergo videtur quod etiam nunc tempore gratiae ecclesia non venit catholica nominanda. Tertio³ sic. Ecclesia Romana dicitur universalis, ut in cap. in nomine Domini, distin. xxiii. licet non sit per orbem diffusa, ergo videtur quod ecclesia non sit dicenda catholica ea ratione, quod per totum mundum extensa sit et omnium gentium societate constituta. Quarto⁴ sic. Omnes ecclesiae particulares per orbem dispersae catholicae appellantur, ut in cap. quamvis, distin. xxi. ergo hoc non videtur esse proprium universali ecclesiae. Quinto⁵ sic, si ecclesia esset dicenda catholica, id est universalis, videretur quod pastor eius et rector scilicet Rom. pont. dicendus veniret universalis, sed hoc prohibetur, ut in c. nullus, et c. ecce, dist. xcix. expresse habetur.