Cursus Philosophicus Thomisticus, Secunda Pars Artis Logicae
John of St. Thomas (1589–1644)
Secunda pars artis Logicae of the Cursus Philosophicus Thomisticus of John of St. Thomas (Joannes a Sancto Thoma), from the Reiser edition (Marietti, Turin, 1930), Reiser tomus I, pars secunda.
Praefatio I: Auctoris praefatio in 4. editionem secundae partis artis Logicae
Lectori1
Oppignoratam fidem meam in emittenda secunda Logicae parte, editione hac libero, legentium utilitati felicius obstrictam, avidius vinculatam. Certe quod in me fuit, addiscentium commodo intentus, quibus in longum disputatae quaestiones non parum impedimento sunt et taedio, fateor sic me ista tractasse, ut accuratioribus oculis haud quaquam praeluxisse praesumam, at nec tardioribus offudisse caliginem, illud perpetuo curans, ut quanta brevitate fieri possit, quid tenendum sit, aperiatur, ne variis ambagibus disputationem terendo dum aliorum placita displicent, sententiam propriam suspendamus. Optime enim admonuit Ambrosius praefatione in Psalmos2 «faciliora esse, quae brevius explicantur». Praecipuam autem scriptoris intentionem praesertim in istis prioribus scientiis enucleandis in eo sitam arbitror, ut facilitatem potius exhibeat quam eruditionem et multiplicem doctrinae paraturam.
Quod in prima Logicae parte promisimus de quaestionibus pluribus quae ibi tractari solent, hic expediendis, plane solvimus, excepto quod iustis de causis tractatum de signis, pluribus nec vulgaribus difficultatibus scaturientem, ne hic iniectus aut sparsus gravaret tractatus alio satis per se graves, seorsum edendum duximus loco commentarii in libros Perihermenias simul cum quaestionibus in libros Posteriorum, et pro commodiori libri usu a tractatu Praedicamentorum seiunximus.
Quod reliquum Philosophiae naturalis pro integro artium cursu complendo desideratur, simili stilo ac labore in diem evulgandum eadem fide iterum obligata devovemus. Vale.