Apologeticae sive Theologiae Fundamentalis, Tomus I: Demonstratio Christiana
Hilarin Felder (1867–1951)
Apologeticae sive Theologiae Fundamentalis
First published 1923
Hilarin Felder, O.M.Cap.'s Apologeticae sive Theologiae Fundamentalis, Tomus I—Demonstratio Christiana—is the Christian-demonstration half of a two-volume Latin manual of fundamental theology. First published at Paderborn in 1920 and revised in the second edition of 1923, it presents a neo-scholastic case for the historical revelation of Christ and the credibility of Christianity, using Scripture, history, and theological argument for classroom formation. Felder's work belongs to the mature manual tradition that shaped Catholic apologetics before the mid-century renewal. Schola presents the 1923 Latin edition with an English translation.
Praefatio
Alumnis sacrae theologiae salutem!
Manuale hoc theologiae apologeticae sive fundamentalis vestrum potius est quam meum. Prodiit nimirum e continua vobiscum in scholis conversatione atque docendi munere, quo, Deo favente, per XXV annos iamiam functus sum. Atque id unum tunc docendo et nunc scribendo sollemne habui, dilectissimi alumni, ut vestrae utilitati incumberem, vestro profectui studerem, vestro ingenio apologeticam accommodarem.
Disciplina quidem apologetica ultimis hisce lustris maiores continuo partes obtinuit in studiis theologicis. Etenim quo tenacius portae inferi adversus Christum eiusque ecclesiam praevalere conantur, eo fortius in dies aciem apologeticam oportuit instrui. Imprimis sacerdotes, populi christiani duces, cinctos esse decet non qualicumque scientia apologetica, sed solidiore ea, quae par est altissimo muneri, quo pollent, atque hodierni temporis circumstantiis, quibus medentur. Unde etiam vos, tirones militiae sacrae, fortissimam necesse est induere "armaturam Dei, ut possitis resistere in die malo et in omnibus perfecti stare" (Eph 6, 13).
Hoc proposito ductus eas omnes quaestiones theologiae fundamentalis, quae scitu necessariae et opportunae videbantur, pertractare studui ea diligentia eaque methodo, ut tam nostrae aetatis difficultatibus et exigentiis quam recentissimo apologeticae statui congruant. Dicendi tamen genere usus sum simplici et, quantum licuit, lucido. Unde neque sprevi locutiones quasdam orationi classicae et eleganti quidem insolitas, longo tamen usu scholastico sancitas atque intelligentiae alumnorum aptas.
Patres et scriptores ecclesiasticos secundum editionem mignianam ita citavi, ut litterae ML vel MG legendae sint: Migne Patres Latini vel Migne Patres Graeci, et prior numerorum sequentium tomum, posterior vero columnam designet. Patres apostolicos adhibui secundum editionem funkianam "novam", Cypriani vero opera secundum editionem hartelianam, additis litteris F et H. Definitiones et declarationes ecclesiae de rebus fidei et morum plerumque reddidi ex "Enchiridio symbolorum" Henrici Denzinger (editione decima tertia, quam paravit Clemens Bannwart S. I.), adiectis numeris marginalibus (v. g. Denz. n. 10).
In allegandis et enumerandis operibus recentioribus tam largus tamque parcus esse studui, quam ferebat ratio libri manualis. Nominibus auctorum acatholicorum assignavi asteriscum, quotiescumque e connexu non apparet eos alienos esse. Ceterum, ad hos auctores eo dumtaxat consilio remisi, ut indicarem eos de aliqua materia scripsisse, necnon consuli posse a lectoribus debita facultate munitis.
Superest, ut Deo Optimo Maximo gratias agam, quod, orbe terrarum teterrimis bellis concusso, hunc librum scribi permiserit in insula pacis helvetica. Et utinam opus vobis, dilectissimi alumni, oblatum non esset indignum Pacificatoris illius, de quo apostolus: "Ipse enim est pax nostra, qui fecit utraque unum" (Eph 2, 14). "Gratia vobis et pax adimpleatur in cognitione Dei et Christi Iesu Domini nostri" (2 Petr 1, 2). Valete!
Friburgi Helvetiorum, die 20. Aprilis 1920.
Auctor.