De docta ignorantia

Deinde clarius videbitur triangulum esse circulum. Nam ponatur quod sit triangulus a b c creatus per positionem, per circumductionem lineae a b quous-

FIGURA pg079: curved triangular sector with vertex a below and arc from b to c above

que b venit in c, a fixo remanente non habet dubium, quando linea a b esset infinita et penitus circumduceretur b quousque rediret ad initium, circulum maximum esse; cuius b c est portio, quia est portio arcus infiniti, tunc est linea recta b c, et quoniam omnis pars infiniti est infinita, igitur b c non est minor integra ambitu circumferentiae infinitae; erit igitur b c non tantum portio, sed completissima circumferentia. Quare necessarium est triangulum a b c esse circulum maximum, quia b c circumferentia est linea recta, non enim maior a b infinito, cum infinito non sit maius; nec sunt duae lineae, quia duo infinita esse non possunt. Quare linea infinita, quae est triangulus, est etiam circulus, quod fuit propositum. Adhuc quod linea infinita sit sphaera, ita manifestum est: linea a b est circumferentia maximi circuli, immo et circulus, ut iam probatum est; et est in triangulo de b ducta in c, ut supra dictum est; sed b c est infinita linea, ut etiam statim probatum est. Quare a b rediit in c, supra se reditione completa; et quando hoc est, sequitur sphaeram necessario exortam esse ex tali revolutione circuli supra se; et quia supra probatum est a b c esse circulum, triangulum et lineam, habemus nunc probatum esse etiam sphaeram. Et ista sunt quae investigare proposuimus.