Sancti Angeli, purissimi spiritus, ministri Dei Altissimi, qui facitis voluntatem eius, et orantium preces in coelum deferitis; tuque praecipue fidelissime Custos meus, state mecum iuxta aram, in qua Deo Patri totius mundi pretium oblaturus sum, et in vestris thuribulis incensum orationum mearum suscipite, ut fumus aromatum huius divini sacrificii ascendat per manus vestras in conspectu Dei. Purgate, illuminate, perficite, et dirigite me, vestramque puritatem et innocentiam impetrate mihi, ut appaream coram Deo decenter ornatus.
Sancti Archangeli, duces illustrissimi militiae coelestis, instruite me, ut haec sancta mysteria percipiam, fidemque vivam et efficacem huius sacramenti in me excitate.
Altissimi Principatus, vera pace interna animam meam componite, ut in ea iugiter commoretur Dominus, de quo scriptum est: Et factus est in pace locus eius.
Sanctissimae Virtutes, assistite mihi, ut proficiens de virtute in virtutem, Deum deorum dignus sim oculo fidei cernere, et manibus contractare, intus recipere, ac tandem in patria clare vobiscum intueri.
Invictissimae Potestates, daemonum impetus cohibite, ne mihi appropinquent sacrificanti, ut sine impedimento digne merear Deo servire, et ministrare.
Potentissimae Dominationes, veram mihi et sanctam libertatem obtinete, ut nec peccato serviam, nec corporis mei appetitui, et sensibus subdar.
Throni stabiles et sublimes, sedes pulcherrimae Dei, discam a vobis veram humilitatem et subiectionem, ut fiat anima mea gratissimum domicilium Deo, qui superbis resistit, et super humilem et quietum requiescit.
Clarissima et nobilissima coeli lumina Cherubim, illustrate mentem meam plenitudine scientiae, ut summam vilitatem meam, huiusque sacrificii infinitam excellentiam agnoscam.
Supremi Spiritus Seraphim, ardentissimi amatores Dei, solvite gelu cordis mei, et vestrum in eo ignem succendite, ut Deum vobiscum ardentius amem, atque utinam sicut vos.