De Sacrificio Missae
Giovanni Bona (1609–1674)
First published 1658
Cardinal Giovanni Bona’s De Sacrificio Missae is an ascetical guide to the worthy celebration of the Holy Sacrifice of the Mass. Addressed particularly to priests, it combines an account of the sacrifice, its efficacy, fruits, and application with practical instruction on priestly holiness, intention, devotion, preparation, the celebration itself, and thanksgiving afterward. Bona’s purpose is not merely ceremonial: the work seeks to form the interior dispositions by which the priest may celebrate attentively, devoutly, and reverently. The work first appeared in 1658. This transcription follows the 1810 Waterford edition and contains the author’s Praemonitio and Chapters I–VII, including the prayers and devotional exercises represented in the submitted sections; other appended matter is omitted.
Praemonitio I: Ad Sacerdotes de Usu et Scopo Huius Libelli
Paucis te in hoc vestibulo sistam, quisquis es Christi Sacerdos, qui hanc meam lucubrationem evolvere dignaberis, ut in ea edenda propositum meum, eiusque scopum, et usum noscas. Cum primum Sacerdotio initiatus fui, illud protinus animo versare caepi, quam ardua res esset suscepto ministerio rite fungi, et ipsum Dei Filium pro meis et aliorum peccatis incruento sacrificio quotidiane immolare. Actus igitur conscientiae stimulus, sanctorum Patrum et recentiorum fere omnium, qui de Missa sancte celebranda aliquid ediderunt, scripta percurrens, plura ex illis documenta excerpsi, quibus in unum congestis, paucisque de meo additis, hoc Opusculum composui, quod, amicis impellentibus, multos post annos publici iuris facio. Et primo quidem de ipso Sacrificio, eiusque valore et fructibus quaedam generaliter praemitto. Secundo de his ago, quae ad rite et pie celebrandum Sacerdoti necessaria sunt. Tertio de antecedentibus Missae celebrationem, et de proxima ad eam praeparatione. Quarto de ipsa celebratione. Demum de his, quae Sacro absoluto facienda sunt.
Inserui aliquot orationes et exercitia pro me, meique similibus adhuc in limine perfectionis haerentibus, quibus si quis assueverit, a distractionibus praeservari, Deique amore succendi facile poterit. Alios autem, qui in altiori gradu sunt constituti, sublimiores exercitationes Spiritus sancti unctio docebit.
Porro haec exercitia non eo consilio descripta sunt, ut in singulis diebus a Sacerdote rem divinam acturo peragantur: sed legendus aliquoties libellus est, donec documenta in eo tradita bene animo percipiantur, et voluntas piis affectibus imbuatur: tum ea quisque seliget, quibus se magis affici senserit; et quoties celebrare voluerit, aliqua ex illis pro suo arbitrio, et devotione assumet.
Terret quosdam prolixitas, sed inexpertos, qui tandem usu et exercitatione edocti, quae prius ardua, et operosa putabant, expeditissima esse, minimique negotii experiuntur. Velocius enim mens operatur quam lingua; et quae nonnisi longo sermone explicari possunt, unico mentis actu concipiuntur. Plura docebit usus, Deo iuvante, cuius gratiam, ut mihi et omnibus, qui hoc meo labore uti voluerint, uberrime aspiret, enixe deprecor; sed mihi praecipue ne forte cum aliis praedicaverim, ipse reprobus efficiar.