De Castitate et Mediis eam Tuendi

Damiano nepoti inter caeteras virtutes castitatem praecipue commendat: quam ut facilius tueatur, quotidie ut Dominicum corpus percipiat suadet. Deinde contra insidias daemonis illum instruit. Postremo, ut se priori commendet, petit: quem de hospitalitate servanda admoneat.

DAMIANO charissimo filio PETRUS peccator monachus paternae dilectionis affectum.

Quia litterarum gerulus anxie parat exire, non possum, quae mittenda sunt, elimata styli digestione conscribere; teque volo ut potius veri consideres sensum, quam aucuperis lenocinia phalerata verborum. Interim itaque, dum praesto rescribere nequeo, sufficiat hoc tibi simpliciter scribi, quod Timotheo velut aequaevo per epistolam Apostolus praecipit: «Dum venio, inquit, attende lectioni, exhortationi, atque doctrinae (I Tim. IV).» Cui nimirum iam et ista praemiserat: «Exemplum esto fidelium in verbo, in conversatione, in charitate, in fide, in castitate (Ibid.).»