Rhythmus de incarnatione Christi

Quo divinum id opus omnes artium liberalium regulas aspernatum fuisse perquam ingeniose cecinit.

Grammatica.

Exceptivam actionem

Verbum Patris excipit,

Dum deludit rationem,

Dum naturam decipit:

Casualem dictionem

Substantivum recipit,

Actioque passionem

In hoc verbo concipit.

In hac Verbi copula

Stupet omnis regula.

Rhetorica.

Peregrinas a natura

Nominis positio

Cum in Dei transit jura

Hominis conditio.

Novus tropus in figura,

Nova fit translatio,

Novus color in junctura,

Nova fit constructio.

In hac Verbi copula

Stupet omnis regula.

Arithmetica.

Dum ab uno non recedit,

Alteratur unitas,

Dum in unum se concedit,

Unitur alteritas:

In diversum idem cedit,

In idem diversitas,

Suum tamen non excedit

Limitem simplicitas.

In hac Verbi copula

Stupet omnis regula.

Musica.

Dum Factoris et facturae

Mira fit conjunctio,

Quis sit modus ligaturae,

Quis ordo, quae ratio,

Quae sint vincla, quae juncturae,

Qui gomphi, quae unio,

Stupet sui fracto jure

Musica proportio.

In hac Verbi copula

Stupet omnis regula.

Geometria.

Suae artis in censura

Geometra fallitur,

Dum immensus sub mensura

Terrarum sistitur.

In directum curvatura

Circuli convertitur,

Sphaeram claudit curvatura,

Et sub ipsa clauditur.

In hac Verbi copula

Stupet omnis regula.

Dialectica.¹

Inter locos locum nescit

Locus a contrariis,

Sui locum obmutescit

Exceptum ab aliis:

Fit elinguis, obstupescit,

Fallitur in propriis,

Et de suis erubescit

Logica fallaciis.

In hac Verbi copula

Stupet omnis regula.

Astronomia.

Solis lumen nube tectum,

Nubis sub velamine,

Nostrae carnis fert objectum,

Nec habet in lumine:

Nostrum vergit in defectum,

Sol ortus in Virgine.

In defectu dans effectum,

Lumen in caligine.

In hac Verbi copula,

Stupet omnis regula.